Perempuan Berbisik 50: Bakusedu Sadiki

So nyanda sadap kwa kita da rasa ni ta pe badang... Nyintau kiapa lei... Dapa rasa rupa so abis tu energi for bakerja. Noh bole jo noh kita pe salah dang ini dia, dari ada brapa malang stow kita nyanda ba tidor butul, dari napa tu karja pe banya nya' lei abis-abis dang kamari.

Daripada lei mo rasa-rasa tu saki, hele lei so nimbole ba tarek nafas, rupa tu batu da tindis akang dang ta pe dada ni dia (odooo mateh kasiang e keke... hahaha... dapa inga kamari lei pa ta pe Oma Ringin...)
Lebe bae dang mari jo torang bakusedu lei sadiki neh... Ada ta pe tamang da kirim kwa tu joke, dong bilang dang manado be bakusedu, hehehe...

Marrrrreeee jjjoooo daaannnggg.... tatawa neeehhh ;-)


Baku Piara

KEKE : "Utu tempo apa dang ngana mo kaweng pa kita, so malo kita orang lia lia so ba tinggal deng ngana? Bulan Oktober jo neh !"
UTU : "Oh ... nemboleh no! soalnya kita ada banya urusan dikantor bulan Oktober"
KEKE : "Kalo bagitu November jo dang."
UTU : "Adoh... kasiang jo pa ngana..... November kita mo ada pelantikan kenaikan pangkat"
KEKE : "Oh kalo bagitu Desember jo neh... biar rame"
UTU : "December kua talalo rame karna hari Natal, sabar jo... nanti January taong datang"
KEKE : "Oh... jangan January bahaya... ngana mo geger otak..."
UTU : "Dari mana ngana tahu... tukang ramal so ngana?"
KEKE : "Kita bukan tukang ramal... maar kalo so' bulan January kita mo beking picah deng botol ngana pe kapala..."
UTU : "!!/$@#?!!!"


Brapa Liter

Suatu waktu, Kale pigi pa Oom Petu pe warong. Pas sampe dimuka warong.
Kale : “Oom Petu, bli roko dang…?”
Oom Petu : (acuh sambil ba ator jualan)
Kale : (deng suara yang sadiki keras) “Oom Petu…bli roko dang ?”
Oom Petu : (masih tetap acuh)
Kale : (bataria keras skali) “Oom petu….! Bli roko dang…!”
Oom Petu : (deng nada marah) “Eh..Kale, baku hormat sadiki deng orang tua, ngana pe kira kita pongo ? Brapa liter minya so ngana mo bli ?”
Kale : ???


Tanta Ola Beli Kacamata

Tanta Ola so rasa stress, lantaran, dia kalu lia orang so sadiki babayang.
Lantaran dia pikir depe mata so rusak, dia pigi di toko kaca mata.
Pelayan : “Siang tante, ada yang boleh kita bantu?”
Tanta Ola : “Kita pe mata so rusak ini noh…cari akang kacamata yang pas dang?”
Pelayan : “Tante so pernah pake kacamata?”
Tanta Ola : “Ohh..blum….”
Pelayan : “Kalu bagitu torang priksa dulu tante pe mata. Mari tante, torang ke tampa priksa.”
Pelayan : “Tante, ini huruf apa ?” (sambil tunjung tu huruf yang sadiki basar )
Tanta Ola : “Nyanda jelas noh…”
Pelayan : “Kalu huruf ini dang?” (Sambil tunjung tu huruf yang lebeh basar)
Tanta Ola : “Masih nyanda jelas noh…”
Pelayan : “Ini komaling tanta huruf yang paling besar yang ada disini. Sekarang tanta bilang, ini huruf apa?” (sambil tunjung huruf yang depe basar
rupa piring )
Tanta Ola : “Sama noh…masih nyanda jelas”
Pelayan : (sambil garo-garo kapala lantaran bingo) “Kiapa dari tadi nyanda jelas dang tanta?”
Tanta Ola : “Kita kwa nintau babaca, ngana kase tunjung huruf. Mana kita mo tau?”


(masi ada lei, maar baku sambung jo neh...daaaggg)